Қазақстанда балаларға арналған SIM-карта енгізу ұсынылды

Мәжіліс кулуарында Оқу-ағарту вице-министрі Еділ Оспан балалардың интернеттегі қауіпсіздігі үшін Қазақстанда балалар SIM-картасын енгізу жоспары туралы айтты, деп хабарлайды KAZ.NUR.KZ.

"Балаларға арналған жеке SIM-карта керек. Сол себепті балаларға арналған SIM-карта енгізуді ұсынып отырмыз. Ол ата-аналардың бақылауында болады. Бала сол SIM-карта арқылы интернетке қосылса, міндетті түрде ата-аналардың рұқсаты сұралады", - деді вице-министр.

Еділ Оспанның сөзінше, министрлік осындай жүйені енгізуді ұсынып отыр. Сонымен қатар техникалық мүмкіндіктерді зерттей келе, мұны дұрыс және өзекті деп санайтынын жеткізді.

"Бұл баланың интернетте қандай сайтқа кіргенін, қандай әлеуметтік желіде отырғанын бақылауға мүмкіндік береді. Сондай-ақ карта арқылы баланың интернетке кіретін уақытын шектеуге де болады", - деді вице-министр Еділ Оспан.