Жұмада Қазақстан мегаполистерінде 31 градусқа дейін ыстық болады деп күтілуде

Синоптиктер 28 сәуір, жұма күні Қазақстанның ірі қалалары – Астана, Алматы және Шымкентте аптап ыстық болатынын айтты. Тиісті болжам "Қазгидромет" РМК ресми сайтында жарияланған.

Болжам бойынша бүгін күндіз Алматыда термометрлер 25-27 градусқа дейін көтеріледі, түнде оңтүстік астанада 12-14 градус жылы болады. Жауын-шашын болмайды, желдің жылдамдығы секундына 0-ден 5 метрге дейін жетпек.

Астанада да бүгін жауын-шашын күтілмейді, термометрлер күндіз 25-27 градус ыстықты көрсетеді, ал түнде ауа температурасы 6-8 градусқа дейін төмендейді деп болжануда. Елордада желдің жылдамдығы 5-10 м/с жетуі мүмкін.

Сонымен бірге синоптиктер Шымкентте күндіз ауа температурасы 29-31 градусқа дейін көтерілетінін, ал түнде 12-14 градус жылы болатынын мәлімдеді. Үшінші мегаполисте жауын-шашын болмайды, желдің жылдамдығы 8-13 м/с жетеді деп күтілуде.