Аmanat партиясы экс-депутат Анна Башинскаяның Зеленский туралы сөзіне қатысты пікір білдірді

Аmanat партиясы Алматы қалалық филиалының төрағасы Станислав Канкуров өзінің Facebook-тегі парақшасында экс-депутат Анна Башинскаяның сөзіне пікір білдірді.

"А.Башинскаяның мәлімдемесі Аmanat-тың ұстанымына сәйкес келмейді. Біздің партия басқа елдердің саясатына араласпайды. Анна Башинская бұл пікірі үшін кешірім сұрап үлгерді. Алайда бұл мәлімдемелерді ескере отырып, оның әрекеті тиісті партия органдарында қаралатын болады. Мәслихат депутаты үшін өз мемлекетінің мүддесінен ешнәрсе жоғары болмауы керек", - деп жазды ол.

Бұған дейін Facebook желісінде Башкинская да өз әрекетіне қатысты пікір білдірген болатын.

"Мен Facebook-те Deutsche Welle-де Украина президентінің мәлімдемесіне ойланбастан пікір жаздым. Түркия туралы жазғанда мүлдем басқа ойды айтқым келген. Бауырлас түрік халқынан кешірім сұраймын! Украина және Ресей халқына тек бейбітшілік тілеймін. Кешіріңіз, бұл - менің қателігім. Бұл жағдайға пікір білдіруге құқығым жоқ, біздің өз еліміз бар. Мен депутат ретінде ең алдымен оның амандығын ойлауым керек", - деп жазды ол.

In business хабарлауынша, 29 сәуірде мәслихат депутаты Анна Башинская Facebook әлеуметтік желісінде Deutsche Welle басылымындағы жазбаға пікір білдірді. Владимир Зеленский финдік Yle басылымына берген сұхбатында аннексияланған Қырымды Украинаның бақылауына қайтаруды көздейтінін айтты.

"Түркияда жақсы, Зеленский мырза! Онда жыл бойы жылы", - деп жазған еді Башинская.

Қазіргі уақытта бұл пікір жазба астында жоқ екенін айта кеткен жөн.

Мәтіннен қате тапсаңыз, бізге жазыңыз