Жетісу облысында жоғалып кеткен зейнеткер ескі әскери полигонның маңынан табылды (фото)

Жетісу облысында жоғалған 72 жастағы әйел үш күннен кейін өңірдегі ескі әскери полигонның маңынан табылды. Бұл туралы облыстық полиция департаментінің баспасөз қызметі хабарлады.

Жетісу облысының Панфилов ауданында жоғалып кеткен 72 жастағы Орынбүбі Мұханова табылды. Ол 13 мамырда үйінен шығып кеткен болатын. Зейнеткерді іздеу шаралары үш күннен астам уақытқа созылды. Әлсіреген әйел өзінің туған Лесновка ауылынан 15-20 километр жерде ескі әскери полигонның жанынан табылған.

Еске сала кетейік, бұған дейін Жетісу облысында хабар-ошарсыз кеткен зейнеткерді іздеуге 100-ге жуық адам тартылғаны туралы жазған болатынбыз.

Полицейлер қарт әйелді іздеу шараларына туыстарынан бөлек еріктілер мен шекарашыларды және жергілікті халықты (барлығы 100-ге жуық адам) тартқан еді. Іздестіру тобының бірі қалың тоғай арасынан әжейдің орамалын тауып, зейнеткердің бағытын анықтай алды.

Жалғыз өзі жүрген әйелді жергілікті шопандар байқап, оның ізіне түсіп келе жатқан іздеушілерге хабарлаған. Зейнеткер тамақ, сусыз өте әлсіреп қалған. Оған медициналық көмек көрсетілгеннен кейін туыстары әжейді үйіне алып кетті.

Мәтіннен қате тапсаңыз, бізге жазыңыз