"Ерекше бақылауда болады": оқу-ағарту министрлігі мектеп бітіру кештері туралы пікір білдірді

Оқушылар мен түлектердің мектеп бітіру шарасынан кейін түнгі ойын-сауық орындарында болуы заңмен қатаң реттеледі. Бұл туралы Оқу-ағарту вице-министрі Еділ Оспан орталық коммуникациялар қызметінде өткен брифингте айтты, деп хабарлайды "Астана" арнасы.

Брифингте сөз сөйлеген вице-министр Еділ Оспан айтуынша бүгін барлық мектепте түлектер арнайы салатанатты іс-шараға қатысты.

"Осы шараны өткізгеннен кейін мектеп түлектері осындай сәтті атап өтуі мүмкін. Бұл - ата-аналар мен мектептің өз еріктерінде. Алайда бұл іс-шараларды өткізуге қатысты бірқатар ереже бар екенін атап өту қажет. Ең алдымен бізде қазір сыбайлас жемқорлықтың алдын алу мақсатында ата-аналардан мерекелік іс-шараларды ұйымдастыруға, оның ішінде оны ұйымдастыруға арнайы агенттіктерді тартып, арнайы студияларды жалдауға ақша жинауға тыйым салынған. Осының алдында да ата-аналар мен педагогтерді ескерттік" - деді вице министр.

Еділ Оспан балалардың түнгі ойын-сауық мекемелерінде болуы заңмен қатаң реттелетінін атап өтті.

"Бұл жағдайларда балалардың заңды өкілдерінің бірге болуы, қоғамдық тәртіптің бұзылмауы ерекше бақылауда болады. Мектепті аяқтау - кез келген жасөспірім үшін маңызды, толқитын сәт. Сондықтан мектеп, ата-ана, мемлекеттік орган осы сәтте түлектердің шалыс қимыл, қателік жасамауына, ол сәтті ерекше өткізуіне қолдау көрсетуі керек. Заңдағы шектеу шаралары да осыған бағытталған", - деді ол.