Бүгін еліміздің бірнеше өңірінде аптап ыстық күтілуде

Синоптиктер жұма, 2 маусымда елімізде ауа райы қандай болатынын болжады. Бұл туралы KAZ.NUR.KZ "Қазгидромет" РМК ресми сайтына сілтеме жасап хабарлайды.

Метеорологтардың мәліметінше, бүгін Қазақстанның басым бөлігінде жауын-шашынсыз ауа райы күтіледі. Тек еліміздің батысында, солтүстік-батысында, күндіз оңтүстік-шығыстың таулы аймақтарында найзағай ойнап, жаңбыр жауады.

Сонымен қатар республика бойынша жел күшейіп, батыс пен оңтүстікте шаңды дауыл тұруы ықтимал.

Сондай-ақ бүгін Ақтөбе, Қостанай, Солтүстік Қазақстан, Ақмола, Ұлытау облыстарының басым бөлігінде, Атырау облысының солтүстігінде, шығысында қатты ыстық, еліміздің оңтүстігі мен оңтүстік-батысында өте қатты ыстық болады деп күтілуде.

Бүгін Астана мен Шымкентте де қатты ыстыққа байланысты дауылдық ескерту жарияланып отыр. Жұмада Астанада күндіз 35-37 градусқа дейін ыстық болса, Шымкентте 34-36 градусқа дейін ыстық болмақ.

Бұдан бөлек мамандар Ақмола, Солтүстік Қазақстан, Павлодар, Қостанай, Ақтөбе, Түркістан, Қызылорда облыстарының басым бөлігінде, Атырау  облысының шығысында, Қарағанды облысының оңтүстік-шығысында, Ұлытау облысының орталығында, Абай облысының солтүстігінде, Жамбыл облысының солтүстік-шығысында өрт шығу қаупі сақталатынын, ал Маңғыстау облысының солтүстігі мен орталығында, Жамбыл облысының басым бөлігінде өрт шығу қаупі жоғары екенін ескертті.

Мәтіннен қате тапсаңыз, бізге жазыңыз