"Аптап ыстық бәсеңдейді": алдағы демалыс күндері ел аумағында ауа райы қандай болады

Синоптиктер алдағы үш күн, 10-12 маусымға арналған ауа райы болжамын ұсынды. Бұл туралы KAZ.NUR.KZ "Қазгидромет" РМК баспасөз қызметіне сілтеме жасап хабарлайды.

Метеорологтар мәліметінше, алдағы күндері Қазақстанның басым бөлігінде өткінші жаңбыр жауып, найзағай ойнайды. Сондай-ақ республика бойынша жел күшейіп, бұршақ жауады деп күтілуде.

Синоптиктер 10-12 маусымда еліміздің солтүстігі, шығысы мен орталығында және оңтүстік-шығысының таулы аймақтарында қатты жаңбыр жауады деп болжады. Сондай-ақ Қазақстанның оңтүстік-батысы мен оңтүстігінде шаңды дауыл тұруы ықтимал.

Сонымен қатар еліміздегі жоғары ауа температурасының айтарлықтай төмендеуі күтіледі. Кей аймақтарда аптап ыстықтың бәсеңдеуі байқалады. Мәселен солтүстік пен шығыста ауа температурасы +20...+29°С дейін, ал орталықта +20...+33°С-қа дейін төмендейді.

11-12 маусымда республиканың оңтүстік-шығысында ауа температурасы +23+28°С дейін төмендейді деп күтілуде.