Абай облысында орман өртіне байланысты бір тас жол жабылды

Абай облысындағы орман өрті қатеріне байланысты Шүлбі - Жаңа Шүлбі тас жолы жабылды. Бұл туралы облыстық ТЖД баспасөз қызметі хабарлады.

Абай облысының Төтенше жағдайлар департаменті бүгін, 12 маусым таңғы уақытта облыс аумағындағы барлық абонентке осындай ақпарат таратты.

"12.06.2023 Абай облысы Шүлбі - Жаңа Шүлбі тас жолы жабық. Орман өртінің қатері", - делінген хабарламада.

Еске сала кетсек, 8 маусымда Абай облысындағы Батпаев орман шаруашылығының аумағында алдын ала болжам бойынша 0,3 гектар аумақта ағаштар жанған болатын. Кейін Төтенше жағдайлар министрлігі өрттің ауданы шамамен 60 мың гектарды құрайтынын хабарлады.

Кеше, 11 маусымда Абай облысындағы орман өрті қатты жел салдарынан қайта күшейді. Өрт қаупі төнген Талица, Каштак, Половинки, Бұлақ ауылдарының тұрғындары Семейге эвакуацияланды.

Айта кетейік, Абай облысындағы орман өрті салдарынан 14 адам қаза тапты. Осыған байланысты Қазақстанда 12 маусым жалпыұлттық аза тұту күні болып жарияланды.