Атырау облысында қарақұрт қаптады

Атырау облысындағы Индер ауданында қарақұрт 10 адамды шағып, ауруханаға түскен. Оларға дәрігерлік көмек көрсетілген. Бұл туралы "Хабар 24" арнасы хабарлады.

Телеарна мәліметінше, Индер ауданында қарақұрт шаққан адамдарға дер кезінде дәрігерлік көмек көрсетіліп, қазір олар ауруханадан үйіне шыққан.

Аудан әкімдігінің сілтеме жасаған телеарна хабарлауынша, Атырау облысындағы Көктоғай, Елтай және Бөдене ауылдарында жағдай ушығып тұр. Бүгінге дейін 124 түйені қарақұрт шағып, оның он алтауы өлген. Қалғанын тұрғындар емдеп алған.

Мамандар қарақұрт тек түйелерге ғана емес, жылқы мен сиырға да зиянын тигізіп жатқанын атап өтті. Мамандардың сөзінше, күн ысыған сайын қарақұрттың уы күшейе береді.

"Осы қарақұрт шаққан малдарыңызды жедел түрде ветеринария мамандарына хабарлап, емдік шараларын тездетіп алуларыңызды сұраймыз. Былтырғы көрсеткішке қарағанда биылғы көрсеткіште қарақұрт шағу өте жоғары темпте көрсетіп отыр", - дейді Индер аудандық ветеринариялық станция басшысының орынбасары Ержан Әбішов.