Демалыс күндері Қазақстанда ауа райы қандай болады

Синоптиктер елімізде алдағы үш күнде, атап айтқанда 15-17 шілдеде ауа райы қандай болатынын болжады. Бұл туралы "Қазгидромет" РМК баспасөз қызметі хабарлады.

Метеорологтардың мәліметінше, алдағы күндері еліміздің басым бөлігінде жаңбыр жауады деп күтілуде. Сондай-ақ найзағай ойнап, бұршақ жауып, екпінді жел тұрады деп болжанған. Республиканың батысы, солтүстік-батысы мен солтүстігінде кей уақыттарда қатты жаңбыр күтіледі.

Синоптиктер еліміздің кей өңірлерінде күндізгі температураның төмендейтінін болжады.

Қазақстанның солтүстігінде ауа температурасы +20...+25 градустан +25...+33 градусқа дейін құбылса, солтүстік-батыста термометр +18...+30 градустан +25...+33 градусқа дейінгі аралықты көрсетеді.

Ал еліміздің орталығында ауа темпертаурасы +25...+33 градустан +32...+39 градусқа дейін ыстық болады. Мамандар оңтүстікте алдағы үш күнде аптап ыстық сақталатынын ескертеді. Яғни оңтүстікте ауа температурасы +25...+35 градустан +35...+42 градусқа дейін жоғарылайды деп күтіледі.

Синоптиктер батыс өңірлерде ауа температурасы +22...+35 градус аралығында болса, шығыста +27...+35 градус аралығында жылы болады деп болжауда.

Еліміздің оңтүстік-шығысында температуралық фонда күрт өзгерістер күтілмейді.