Бүгін Қазақстанның ірі қалаларында найзағай ойнап, 36 градус ыстық болуы мүмкін

Бейсенбі, 20 шілде күні Алматы мен Шымкентте жауын-шашынсыз ауа райы сақталады. Ал елордада тағы да найзағай ойнауы мүмкін. Мұндай мәліметті "Қазгидромет" РМК ресми сайтында хабарлады.

Синоптиктердің мәліметінше, бүгін Астанада күн күркіреп, жел секундына 9-14 метрге дейін соғады, екпіні 15-20 м/с дейін жетеді. Бұл ретте елордада термометрлер күндіз 26-28 градус, ал түнде 15-17 градус жылыны көрсетеді.

Алматыда бүгін күн жауын-шашынсыз өтеді. Оңтүстік астанада күндіз 32-34 градусқа дейін аптап ыстық болады. Ал түнде ауа температурасы 21-23 градусқа дейін төмендейді деп күтілуде. Желдің жылдамдығы 3-8 м/с, екпіні 13 м/с болуы мүмкін.

Шымкентте де жаңбыр жаумайды, мамандар көшпелі бұлт шығады деп болжап отыр. Күндіз термометрлер 34-36 градусқа дейін көтерілсе, түнде 21-23 градусқа дейін төмендейді. Желдің жылдамдығы 8-13 м/с жетеді.