"Көлік қозғалысы қиындауы мүмкін": ҰҚК Қазақстан-Ресей шекарасындағы өткізу пунктіне қатысты үндеу жасады

Жол жөндеу жұмыстарына байланысты Қазақстан-Ресей шекарасындағы өткізу пунктінде көлік қозғалысы қиындауы мүмкін. Осыған байланысты ҰҚК Telegram-дағы ресми арнасында азаматтарға үндеу жасады.

"2023 жылғы 27 шілде мен 25 тамыз аралығында Қазақстан Республикасының "Қайрақ" өткізу пунктіне қарама-қарсы Ресей Федерациясының "Бугристое" автокөлік өткізу пунктінде жол төсемін жөндеу жұмыстарын жүргізу жоспарлануда.

Осы ретте, көлік құралдарының қозғалысы қиындап, салдарынан бақылау процедураларының уақыты ұзаруы мүмкін", - делінген хабарламада.

ҰҚК Қостанай облысы арқылы Мемлекеттік шекараны кесіп өту үшін келесі өткізу пункттерін қарастыруды ұсынды:

Халықаралық өткізу пункті:

• "Ақбалшық" авто (ҚР) – "Воскресенское" авто (РФ);

Екі жақты өткізу пункттері:

• "Обаған" авто (ҚР) – "Звериноголовское" (РФ)
• "Желқуар" (ҚР) – "Мариинский" (РФ)
• "Аят" (ҚР) – "Николаевка" (РФ)
• "Қондыбай" (ҚР) – "Комсомольский" (РФ).

Сондай-ақ ведомство қалыптасып отырған жағдайға байланысты азаматтарға қозғалыс бағыттарын алдын ала жоспарлауды ұсынып отыр.