"Мемлекетаралық іздеу жарияланды": полиция Бейбіт Шүменовтің ісіне қатысты пікір білдірді

Астана қаласының полиция департаменті боксшы Бейбіт Шүменовке қатысты істің кейбір дерегін жария етті. Ведомство боксшыға мемлекетаралық іздеу жарияланғанын атап өтті, деп хабарлайды KAZ.NUR.KZ.

"18 маусымда Mega Silkway сауда орталығында болған оқиғадан кейін Астана полиция департаменті Бейбіт Шүменовке қатысты Қылмыстық кодекстің 293-бабы "Бұзақылық" бойынша сотқа дейінгі тергеу амалдарын жүргізіп жатыр.

Сонымен бірге бұл азамат қылмыстық іс жүргізу заңнамасының нормаларына сәйкес ресми түрде мемлекетаралық іздеуге жарияланды", - делінген полиция хабарламасында.

Айта кетсек, осыған дейін боксшы Бейбіт Шүменов 2 күннен бері іздестіріліп жатқанын хабарлаған едік.

Астанададағы сауда орталығында бокстан бұрынғы әлем чемпионы Бейбіт Шүменов қолында баласы бар адамды ұрып-соққанын жазған едік. Бұл ақпаратты Ішкі істер министрінің орынбасары Қайрат Сұнтаев растады.

Кейін боксшы Бейбіт Шүменов балалы ер адаммен не үшін төбелесіп қалғанын айтып, жағдайға қатысты мәлімдеме жасаған болатын.

Сонымен қатар еліміздің Бала құқықтары жөніндегі уәкілі Динара Зәкиева балалы ер адамды ұрған Бейбіт Шүменовті тағы бір бап бойынша жауапқа тартуды ұсынған еді.

Одан бөлек, ІІМ Астананың сауда орталығында болған Бейбіт Шүменовтің төбелесіне қатысты қылмыстық іс қозғағанын жазған едік.