"6 жастан бастап қабылдайды": елімізде бірінші сыныпқа құжаттарды қалай онлайн өткізуге болады

Үлгілік қағидаға сәйкес, 1-сыныпқа қабылдау бойынша мемлекеттік қызмет көрсету электрондық форматта "Электрондық үкіметтің" egov.kz веб-порталы арқылы жүзеге асырылады. Бұл туралы Алматы әкімдігінің Telegram-дағы ресми арнасында хабарланды.

Биылғы оқу жылында білім мекемесіне баланың даярлық деңгейіне қарамастан, мектеп маңында (шағын учаскеде) тұратын барлық бала қабылданады.

Сондай-ақ әкімдік мәліметінше, балаларды мектепке өздерінің шағын аумағы бойынша ғана емес, бос орындар болған жағдайда кез келген басқа мемлекеттік мектепке де тіркеуге мүмкіндік бар.

"Бірінші сыныпқа қабылдау үшін баланың ата-анасы немесе заңды өкілі жеке өтініш жазуы керек.

Сонымен қатар баланың туу туралы куәлігінің көшірмесін, 026/у-3 үлгідегі денсаулық жағдайы туралы құжатты, 065/у үлгідегі денсаулық жағдайы туралы құжатты және 3х4 өлшеміндегі екі фотосуретті өткізу қажет. Мектепке қабылдау – 6 жастан басталады", – делінген хабарламада.

Сол арада әкімдікте Алматы бойынша бірінші сыныпқа құжаттарды қабылдау 1 сәуірде басталғанын еске салды. Осы уақытқа дейін Алматыда бірінші сыныпқа қабылдау үшін 25 мыңнан астам өтініш түскен. Өтінім 1 тамызға дейін қабылданады.

Мәтіннен қате тапсаңыз, бізге жазыңыз