Қарағандыдағы балалардың жаппай улануы: зардап шеккендер саны артты

Қарағандыда балаларға арнаулы әлеуметтік қызмет көрсету орталығында 12 жасөспірім уланып, бір бала қайтыс болған еді. Ал бүгінде зардап шеккендер саны артты. Бұл туралы "Хабар 24" арнасы хабарлады.

Телеарнаның хабарлауынша, ауруханаға тағы екі бала келіп түскен. Қазір ауруханада тіркелген зардап шеккендер саны 14-ке жетіп отыр.

Алты бала қазір жансақтау бөлімінде жатыр, екеуінің жағдайы өте ауыр. Қалғандарының денсаулығы қанағаттанарлық.

Сондай-ақ арнаның хабарлауынша, зардап шеккендерде интоксикация мен тыныс алу жетіспеушілігі анықталған.

Балалар жаппай уланған орталықта қазір 160 мүгедектігі бар бала жатқаны атап өтілді. Көбінесе бұл жетімдер немесе ата-анасы бас тартқан балалар.

Қазір Денсаулық сақтау министрлігі мен еліміздің жетекші клиникаларынан жіберілген мамандар балаларды өз бақылауына алды.

Аталған оқиғадан кейін "Санитариялық ережелерді бұзу" бабы бойынша қылмыстық іс қозғалды. Оқиғаның себебін арнайы прокурорлар анықтап жатыр.

"Алдын ала болжам бойынша алғашқы тексеру кезінде ішек инфекциясы байқалған жоқ, теріс нәтиже берген. Қазір дәрігерлер неліктен балалардың осындай ауыр халге ұшырағанын анықтауда", – деді Денсаулық сақтау министрі Ажар Ғиният.

Қарағандыда балалардың улануы

Еске сала кетейік, бұған дейін Қарағанды облысында әлеуметтік қызмет көрсету орталығында бірнеше бала уланып, ауруханаға жатқызылған. Жаппай улану салдарынан бір баланың көз жұмғаны белгілі болғаны туралы жазған едік.

Кейін Қазақстанның бас санитариялық дәрігері Айжан Есмағамбетова министрлер кабинетінің кулуарында Қарағандыда балалардың жаппай улануын тексеру барысында олардың тамақтан уланбағаны белгілі болғанын айтты.

Сонымен қатар улану фактісі бойынша қылмыстық іс қозғалып, жағдайды Бас прокуратура бақылауға алды.

Одан соң Қарағандыда арнаулы әлеуметтік қызмет көрсету орталығында балалардың жаппай улануынан кейін мекеме басшысының міндетін атқарушы мен 12 медицина қызметкері жұмыстан шығарылған болатын.