Көлік қозғалысы шектеледі: Алматыда үлкен көшелердің бірінде жөндеу жұмысы басталады

4 тамызда Алматы қаласы Сейфуллин даңғылында орташа жол жөндеу жұмыстары басталады және ол 6 тамызға дейін созылады. Бұл туралы Алматы жол жөндеу қызметінің Telegram-дағы ресми арнасында хабарланды.

Ведомство мәліметінше, 4 тамыз сағат 23:00-ден 6 тамыз сағат 07:00-ге дейін Сейфуллин даңғылының Алматы-1 темір жол вокзалынан Жұмабаев көшесіне дейінгі бөлігінде полимерлі асфальтбетон жабынын төсеу жұмыстары жүргізіліп, көлік қозғалысы толығымен шектеледі.

"Жөндеу жұмыстары жүріп жатқан аумақты Ақан Сері, Зорге, Осипенко, Ержанов, Жансүгіров, Жұмабаев көшелері арқылы айналып өтуге болады", - делінген хабарламада.

Ведомство ақпаратынша, Алматы-1 теміржол вокзалына Ақан Сері, Сүйінбай, Шолохов, Зорге, Ержанов, Осипенко көшелері арқылы жетуге болады.

Сондай-ақ ведомствода жол-көлік оқиғасын алдын алу мақсатында және жол қозғалысын ұйымдастыру үшін патрульдік полицияның 4 экипажы қызмет ететіні атап өтілді.

Мәтіннен қате тапсаңыз, бізге жазыңыз