"Қазақстан халқына" қоры жаңа оқу жылына 850 білім грантын бөлді

2023-2024 оқу жылында "Қазақстан халқына" қоғамдық қоры бакалавриат бағдарламалары бойынша талапкерлерге жоғары және жоғары оқу орнынан кейінгі оқу ұйымдарында күндізгі оқуға 850 білім беру грантын бөлді, деп хабарлайды қордың баспасөз қызметіне сілтеме жасаған KAZ.NUR.KZ.

Гранттар "Қазақстан халқына" ҚҚ Білім беру гранттары" қайырымдылық бағдарламасы аясында бөлінген.

Білім беру грантын Қазақстан Республикасының келесі азаматтары иелене алады:

1) ауылдық жерлердегі, шағын және моноқалалардағы аз қамтылған отбасылар;

2) жетім балалар немесе кәмелетке толғанға дейін ата-анасының қамқорлығынсыз қалған балалар;

3) мүгедектігі бар азаматтар;

4) мүгедек балаларды тәрбиелеп отырған отбасылар;

5) 2022 жылғы қайғылы қаңтар оқиғалары кезінде қаза тапқан Қазақстан Республикасы азаматтарының балалары;

6) 2022 жылғы қайғылы қаңтар оқиғалары кезінде жараланған балалар;

7) төтенше жағдайлар кезінде зардап шеккен Қазақстан Республикасының қаза тапқан азаматтарының балалары (Қордың Қамқоршылық кеңесінің шешімі негізінде).

Бағдарламаға қатысудың шекті жасы толық 29 жасты құрайды.

Білім беру гранттары байқауына қатысу үшін құжаттар оқу орындарының қабылдау комиссияларына тапсырылады. Білім беру гранты тағайындалатын үміткерлердің тізімін оқу орындары биылғы күнтізбелік жылы ҰБТ-дан өткен және оның нәтижелері бойынша оқуға түсу үшін қажетті өту балын жинаған (оның ішінде шығармашылық емтихандарды ескере отырып) талапкерлер қатарынан қалыптастырады. Грант тағайындалатын талапкерлердің тізімін Қор Басқармасы бекітеді. Бұл ретте Қор үміткердің бағдарлама талаптарына сәйкестігіне ғана қарайды.

Білім беру грантының иегерлеріне оқу жылына 1 миллион теңгеге дейін оқу ақысы төленеді және бүкіл оқу мерзімі ішінде 40 000 теңге мөлшерінде ай сайынғы шәкіртақы төленеді. Шәкіртақы жазғы демалыс кезеңін қоспағанда, 10 ай ішінде (жыл сайын) төленеді.

Білім беру гранты бір рет ұсынылатын атаулы грант болып саналады, екінші жоғары білім алуға білім беру грантын алуға жол берілмейді. Білім беру гранты өз қалауы бойынша және үлгерімінің төмен болуына байланысты оқудан шығарылған жағдайларда, сондай-ақ студент оқудың екінші жылына қалдырылған және білім беру гранты иеленушісінің Бағдарлама қатысушы екендігін растайтын күмәнді ақпарат және/немесе дәйексіз құжаттар ұсынылған жағдайда тоқтатылады.