"Әйелі үйден шыға алмай қалған": Алматы облысында үйі өртеніп кеткен мүгедек азамат екі баламен далада қалды (фото, видео)

18 тамыз күні Алматы облысы, Қарасай ауданы, Іргелі ауылында екінші топтағы мүгедек Төремұратов Мұхтардың үйі өртеніп кетті. Әйелі Қамчыбек Береке екі баласын құтқарамын деп жүріп, өртенген үйден шыға алмай қалған, деп хабарлайды KAZ.NUR.KZ тілшісі.

Қайғылы жағдай жайлы ер адамның қарындасы Құралай Төремұратова баяндап берді.

"Оқиға жұма күні орын алды. Мен үйге сағат 20:10-да барғанымда, толықтай жанып кеткен еді. Үйдің жарығынан ақау кетіп, өрт басталған. Ол уақытта ағам үйде болмаған. Ал жеңгем балаларын құтқарамын деп жүріп, өзі үйден шыға алмай қалған. Мен тұрмыстамын, бөлек тұрамын.

Үй бес бөлмелі, өзіміз салған едік. Жеңгемді кеше, яғни 21 тамыз күні жер қойнына тапсырдық", - деді қарындасы Құралай Төремұратова.

Қарындасының айтуынша, 1987 жылы туған Төремұратов Мұхтар екінші топ мүгедегі. 2022 жылдың сәуірінде ота жасалған, ішегі жоқ, осы себепті де жұмыссыз. Ал жеңгесі Береке 1991 жылы дүниеге келген екен.

Қазір Берекені жоқтап, екінші топтағы мүгедектігі бар Төремұратов Мұхтар мен оның ұлдары алты жастағы Өмірсерік пен төрт жастағы Әнуар қалды.

"Көпшіліктен қазір ағам мен балаларына қолдан келгенше қаржылай немесе үй алып беруге көмек көрсетуін сұраймын. Денсаулығы сыр берген ағам мен екі кішкентай баласы далада қалды", - деді Құралай Төремұратова.