Ақмола облысында сібір жарасын жұқтырған науқастардың жағдайы туралы не белгілі

Ақмола облысында сібір жарасын жұқтырған 15 науқастың, үшеуінің жағдайы тұрақталды. Елдімекенде дизинфекциялық шаралар жүргізіліп жатыр, деп хабарлайды "Хабар 24" арнасы.

Телеарна хабарлауынша, Есіл аудандық инфекциялық ауруханада қауіпті кесел жұқтырған 15 адам жатыр. Мамандардың сөзінше, 11 науқастың диагнозы зертханалық түрде расталса, қалғанының сараптамасы әзірге белгісіз.

Тілші мәліметінше, науқастармен байланыста болған 35 тұрғын дәрігерлердің бақылауына алынған. Қазір елдімекендегі малға індетке қарсы жаппай екпе егіліп жатыр.

"Барлық науқасқа қажетті ем-дом шаралары көрсетіліп жатыр. Ауруханадағы 15 адамның үшеуінің жағдайы тұрақталды. Ал қалған науқастардың жағдайы орташа. Қазір ауылда індет анықталған 536 келі малдың еті толық жойылды. Елдімекенде дезинфекциялық шаралар жүргізіліп жатыр", - дейді Санитариялық-эпидемиологиялық бақылау департаменті басшысының орынбасары Серік Омарханов.

Еске сала кетсек, 1 қыркүйекте Жарқайың ауданындағы Үшқарасу ауылында сібір жарасын жұқтырды деген күдікпен 10-нан астам адам ауруханаға жатықызылып, елдімекен карантинге жабылған болатын.