Бүгін еліміздің ірі қалаларында ауа райы қандай болады

10 қыркүйекте, жексенбі күні Қазақстанның ірі қалаларында көшпелі бұлтты болады, тұман күтіледі және жаңбыр жаууы ықтимал. Бірақ күн жылы болады. Бұл туралы "Қазгидромет" РМК ресми сайтында хабарлады.

Синоптиктердің болжамынша, 10 қыркүйек күні Астанада күндіз көшпелі бұлтты, жауын-шашынсыз. Ауа температурасы +16...+18 градусты құрайды. Түнде тұман көтеріліп, ауа температурасы +10...+12 градусқа төмендейді. Желдің жылдамдығы күндіз 9-14 м/с, түнде 3-8 м/с.

Алматыда бүгін көшпелі бұлтты, жауын-шашынсыз. Синоптиктер оңтүстік астанада күндіз ауа температурасы +27...+29 градусқа жетсе, түнде +16...+18 градусқа дейін төмендейді деп болжап отыр. Желдің жылдамдығы 3-8 м/с құрайды.

Шымкент қаласында күндіз көшпелі бұлтты, жауын-шашынсыз. Ауа температурасы +30...+32 градусқа жетеді. Ал түнде жаңбыр жауып, найзағай ойнауы мүмкін. Ауа температурасы +18...+20 градусқа дейін төмендейді. Желдің жылдамдығы 8-13 м/с құрайды, екпіні 15-20 м/с жетеді.