Атырауда достарымен бірге балық аулауға кеткен ер адам үш күннен бері табылмай жатыр (фото)

Атырауда достарымен бірге балық аулауға кеткен ер адамнан үш күннен бері хабар жоқ. Қазіргі таңда оны іздестіру жұмыстары жүргізілуде, деп хабарлайды Telegram-дағы ІІМ ресми жаңалықтары арнасы.

Ведомство мәліметінше, 10 қыркүйекте 1987 жылы туған азамат Ербол Құсайыновтың жақындары оның достарымен бірге балық аулауға кетіп, үйге оралмағанын хабарлаған.

ІІМ бүгін үшінші күн Атырау облысында құзырлы органдар жоғалған азаматты іздеу жұмыстарын жүргізіп жатқанын атап өтті.

Іздеу жұмыстарына полиция, төтенше жағдайлар департаментінің қызметкерлері мен Ұлттық ұланның 80 сарбазы, сондай-ақ кинология бөліністері және сүңгуірлер жұмылдырылған.

"Құзырлы органдар әлеуметтік желіде түрлі алып-қашпа ақпараттарды таратпауларыңызды және де жоғалған азаматқа қатысты нақты деректер болса 102 операторына хабарлауыңызды сұрайды", - делінген хабарламада.

Мәтіннен қате тапсаңыз, бізге жазыңыз