Жетісу облысында хабар-ошарсыз кеткен үш жасөспірімнің біреуі табылды

Жетісу облысының полиция қызметкерлері Қаратал ауданында хабар-ошарсыз кеткен үш жасөспірімнің біреуін тапты. Бұл туралы Polisia kz ақпараттық медиа-порталы хабарлады.

Медиа-порталдың мәліметінше, жедел іздестіру шаралары барысында Жетісу облысының полицейлері Қаратал ауданында хабар-ошарсыз кеткен үш жасөспірімнің біреуінің орналасқан жерін анықтады.

"Полицейлер мен туыстары 8 қыркүйектен бастап іздеп жүрген кәмелетке толмаған бала Алматы қаласынан табылды.

Полиция жасөспірімді үйге жеткізіп, ата-анасына тапсырды. Баланың анасы полиция қызметкерлеріне оны іздестіруге жәрдемдесіп, өз үйіне аман-есен оралғаны үшін алғысын білдірді", - делінген хабарламада.

Басылымның жазуынша, хабар-ошарсыз кеткен тағы екі жасөспірімге қатысты іздеу шаралары әлі де жалғасып жатыр.

Кәмелетке толмағандарды іздестіруді облыстық полиция департаменті мен Қаратал аудандық полициясының жедел қызметкерлері жалғастырып жатыр.