Жайдарманшылар Таразда бас қосты

Таразда көңілді тапқырлар ойыншыларының ойыны өтті. Тараз қаласы әкімінің кубогы үшін ұйымдастырылған "Оңтүстік Номад" лигасының финалдық сайысында Қызылорда, Түркістан облыстарынан және Шымкент қаласынан, сондай-ақ жергілікті командаларды қосқанда 7 топ өнер көрсетті.

Финалдық ойын "Баласағұн" орталық концерт залында өтті.

Өткір әзілдерімен көпшілікті баураған "OIY" командасы (Тараз қаласы) бірінші орынды иеленсе, екінші орын Шымкенттен келген "Mademuazel" командасына бұйырды. Ал үшінші орынды "Қарасаз" командасы (Тараз қаласы) қанжығасына байлады.

Сонымен қатар "Сұрап алмадық" командасының мүшесі Әділжан Дәулетов (Қызылорда облысы) "Үздік ойыншы" атанды.

Жеңімпаздар мен жүлдегерлерді шаһар басшысының атынан қала әкімінің орынбасары Дәуір Дәулетов арнайы құттықтап, ақшалай сыйлықтар табыстады.

Қазақы қалжың, астарлы әзілмен ұтымды ойды жеткізе білген көңілді тапқырлар сайысын қолдаған көрермен қауым риза болып, тарқасты.

Мәтіннен қате тапсаңыз, бізге жазыңыз