Өскеменде құны 8,5 млн теңгені құрайтын құрамында никотин бар электрондық темекілер тәркіленді

Өскеменде жедел іздестіру шаралары барысында құны 9 миллионға жуық құрамында никотин бар электрондық темекі, вейп және т.б. бір реттік құрылғылар тәркіленген. Бұл туралы Қаржылық мониторинг агенттігі Telegram-дағы ресми арнасында хабарлады.

Қаржылық мониторинг агенттігінің хабарлауынша, Өскеменде өткізілген жедел-іздестіру шаралары барысында құрамында никотин бар электрондық темекі, вейп және басқа да бір реттік құрылғылар тәркіленген.

Өткізілген іс-шаралардың нәтижеcі бойынша 2000-ға жуық құрылғының жалпы сомасы 8,5 млн теңгені құраған.

Агенттіктің мәліметінше, бұл құқық бұзушылық үшін Әкімшілік құқық бұзушылық туралы кодексте акцизделетін тауарларды тәркілей отырып, 50-ден 500 АЕК-ке дейінгі мөлшерде санкциялық жауапкершілік көзделген.

Іс материалдары сотқа жіберілді.

Агенттікте темекі өнімдері мен бір реттік электрондық темекінің заңсыз айналымына қарсы іс-қимыл бойынша жұмыс жалғасып жатқанын атап өтті.

"Құрметті азаматтар! Дәрігерлердің зерттеулеріне сәйкес, вэйптер мен басқа құрылғыларды қолдану жасөспірімдердің денсаулығына, есте сақтау, өзін-өзі бақылауына және оқу қабілетіне зиянды әсер етеді.

Ата-аналардан балаңыздың мінез-құлқына, оның денсаулық жағдайына және сатып алуларына назар аударуды сұраймыз", - делінген хабарламада.