Air Astana ұшағы Израильдегі қазақстандықтарды алып қайту үшін Тель-Авивке ұшып кетті

Air Astana ұшағы Израильдегі қазақстандықтарды алып қайту үшін Тель-Авивке ұшып кетті. Бұл туралы әуе компаниясы Telegram-дағы ресми арнасында хабарлады.

Әуе компаниясының баспасөз қызметінің мәліметінше, бүгін сағат 08:00-де Air Astana ұшағы Алматыдан Тель-Авивке ұшқан.

Қазақстандықтарды алып қайтатын ұшақ Алматыға жергілікті уақыт бойынша шамамен 23:45-те келеді деп жоспарлануда.

Естеріңізге сала кетейік, бұған дейін Азаматтық авиация комитеті 10 қазанда Air Astana әуе компаниясы қазақстандық азаматтарды Израильден алып қайту үшін Алматы - Тель-Авив - Алматы бағыты бойынша КС-6490/6500 рейсін орындауды жоспарлап отырғанын хабарлаған еді.

Израильдегі жағдай

7 қазан күні таңертең Израильге Газа секторынан зымырандық шабуыл жасалды. Шабуылды палестиналық ХАМАС ұйымы өз мойнына алды.

Кейін Израиль премьер-министрі Биньямин Нетаньяху елдегі ахуалға байланысты мәлімдеме жасап, Израильде "соғыс жағдайы" режимін енгізу туралы шешім қабылданғанын айтты.

Сонымен қатар Қазақстанның Израильдегі елшілігі елдегі ахуалға байланысты қазақстандықтарға үндеу жасады. Дипломаттар отандастарымызды қауіпсіз орындарды болуға шақырды.

8 қазанда Израиль ХАМАС-қа жауап ретінде Газаға әуе шабуылын жасап, әскери операция бастады.

Соңғы мәліметтер бойынша, Израиль-Палестина қақтығысынан 1000-нан аса адам қаза тапқан.