Жауын-шашын, жел, тұман: еліміздің бірнеше өңірінде дауылдық ескерту жарияланды

Синоптиктер ауа райының қолайсыздығына байланысты еліміздің бірнеше өңірінде дауылдық ескерту жариялады, деп хабарлайды "Қазгидромет" РМК ресми сайтында.

Метеорологтардың мәліметінше, 11 қазанда түнде Ақтөбе облысының батысында, солтүстігінде, орталығында 3 градус үсік жүруі мүмкін.

11 қазанда түнде Батыс Қазақстан облысының шығысында, күндіз басым бөлігінде жауын-шашын (жаңбырдың соңы қарға ұласады), түнде өңірдің шығысында, таңертең батысында, солтүстігінде көктайғақ, түнде және таңертең облыстың солтүстігінде, шығысында тұман күтіледі.

11 қазанда Орал қаласында да күндіз жауын-шашын (жаңбырдың соңы қарға ұласады), түнде және таңертең тұман күтіледі.

11 қазанда Астанада жел тұрып, кей уақытта екпіні 15-20 м/с-қа дейін жетуі мүмкін.

11 қазанда Ақмола облысында, сондай-ақ облыс орталығы Көкшетау қаласында да жел тұрып, облыстың солтүстігінде, шығысында екпіні 15-20 м/с-қа дейін жетуі ықтимал.

11 қазанда түнде Түркістан облысының солтүстігінде, батысында, таулы және тау бөктерлі аудандарында, күндіз тау асуларында күші 15-20 м/с-қа дейін жететін жел тұрады деп күтілуде. Бұдан бөлек, 11 қазанда облыстың солтүстігінде, батысында өрт шығу қаупі сақталады.

11 қазанда Шымкент және Түркістан қалаларында да жел тұрып, түнде екпіні 15-20 м/с-қа дейін жетуі мүмкін.

11 қазанда түнде және таңертең Қостанай облысының солтүстігінде, шығысында тұман күтіледі. Сондай-ақ өңірде жел тұрып, облыстың батысында, солтүстігінде екпіні 15-20 м/с-қа дейін жетуі ықтимал.

11 қазанда түнде және таңертең Солтүстік Қазақстан облысының солтүстік-шығысында тұман түсіп, оңтүстік-батыстан жел соғып, түнде облыстың шығысында, күндіз облыстың басым бөлігінде екпіні 15-20 м/с-қа дейін жетеді деп күтілуде.

11 қазанда күндіз Петропавл, Павлодар қалаларында, сонымен қатар Павлодар облысының батысында, оңтүстігінде, шығысында да жел тұрып, екпіні 15-20 м/с-қа дейін жетуі мүмкін.