Елімізде алғаш рет ауыл мектептерінің оқушыларына арналған республикалық олимпиада өтеді

Ауыл мектептері оқушыларының республикалық олимпиадасы биыл қараша мен 2024 жылғы қаңтар аралығында алғаш рет өткізіледі, деп хабарлайды Оқу-ағарту министрлігі ресми сайтында.

Ведомство мәліметінше, аталмыш бастама қала мен ауыл мектептері арасындағы алшақтықты азайтуға бағытталған.

Ауыл мектептері оқушыларына арналған республикалық олимпиада туралы Оқу-ағарту министрлігінде өткен аппарат отырысында белгілі болды.

"Дарын" республикалық ғылыми-практикалық орталығының директоры Ғаждембек Тұрсыновтың айтуынша, олимпиадаға ауыл мектептерінің 9-11 сынып оқушылары қатыса алады.

"Республикалық олимпиадаларда академиялық адалдықты қамтамасыз ету үшін тапсырмалар әр қатысушыға жеке электронды түрде жіберіледі. Олимпиаданың барлық кезеңінде оқушылардың аты-жөні көрінбейді. Әр кезеңнен кейін тапсырмалардың сканерленген нұсқасы, қатысушылардың жұмыстары мен дұрыс жауаптар орталықтың сайтында жарияланады", - дейді Ғаждембек Тұрсынов.

Жоғарыда аталған қағиданың барлығы ең беделді әлемдік IMO, IPhO, IChO, IBO, IGeO, IOI және IOL олимпиадалардың ережелеріне сүйеніп жасақталған. Бұл олимпиадаларда жеңімпаз болған қазақстандықтарға мемлекет тарапынан 500-ден 1500 АЕК-ке дейін қаржылық қолдау көрсетіледі. Биылғы жылы 23 оқушы жүлделі орындарға ие болады.

Оқу-ағарту министрі Ғани Бейсембаев мұндай ауқымды шараның өткізілуі еліміздің бүкіл оқу-ағарту саласының жетістігі екенін атап өтті.

"Пәндік олимпиада – балалардың санасында алғашқы ғылыми ізденістерге жол салатын, болашақ ғалымдарды шабыттандыратын, ғылыммен еркін айналысатын жастар тобын қалыптастыратын ең ауқымды бағдарламалық сайыс. Сондықтан республикалық олимпиадалардың әрқайсысының сапалы әрі жоғары деңгейде өтуі маңызды", – деді Ғани Бейсембаев.