Қызылорда облысында ауыл келіншектері арасында ерекше сайыс өтті (видео)

Қызылорда облысы Ақжар ауылының келіншектері арасында қол күрестен сайыс өтті. Тұрғындардың ерекше назарын аударған сайысқа жиырмаға жуық келіншек қатысты, деп хабарлайды "Хабар24" телеарнасы.

Телеарна тілшісінің мәліметінше, Ақжар ауылының тұрғындары соңғы жылдары қазақтың ұлттық ойындарын дәріптеуді дәстүрге айналдырған. Ал қыз-келіншектер арасында қол күресінен сайыс алғаш рет ұйымдастырылып отыр.

Сайыста қарсылас шыдатпаған Айнұр Асқарбаева жеңімпаз атанса, Асылсат Естан екінші орынды иеленген.

"Үш келіншекпен күш сынастым. Үшеуінде жеңдім. Ауылдың келіншектері өте мықты. Егін егеміз, мал шаруашылығында жүреміз деген сияқты, әйел заты біз көп нәрсені игеріп кетеміз", - дейді Айнұр Асқарбаева.

Жалпы Ақжар ауылының өрендерінің басым бөлігі – қазақ күресімен шұғылданады екен.

"70-тен астам балуан белдесіп жүр. Солардың ішінен Қазақстанның жеңімпаздары шықты. Осы жақын арада бір бала Қазақстан чемпионы болды. Бір баламыз биыл Семей қаласында жасөспірімдер арасында өткен жарысты қазақ күресінен қола жүлдегер атанды", - дейді жарыстың бас төрешісі Мұқамбетқали Таубаев.