Польша әуе компаниясының Алматыға ұшуына тыйым салынған ба: ААК жауап берді

Интернетте поляк әуе компаниясын Алматыға "кіргізбеді" деген ақпарат тарады. Азаматтық авиация комитеті әуе компаниясының бұл қалаға неліктен ұшпайтынын түсіндірді, деп хабарлайды KAZ.NUR.KZ.

Бұған дейін әлеуметтік желіде алматылықтар LOT Polish Airlines әуе компаниясының Алматыдан ұшуға бас тартқанын айтып шағымданған еді.

Азаматтық авиация комитеті бұл пікірлердің шындыққа жанаспайтынын айтты.

"LOT Polish Airlines Астанаға рейстерді 2017 жылдан бастап жүзеге асыруда. Қазіргі уақытта Қазақстан мен Польшаның астанасы арасындағы рейстер аптасына 3 рет (дүйсенбі, сейсенбі, жұма) орындалады.

Алматы әуежайында "ашық аспан" режимі бар, шетелдік әуе компанияларға ұшуға шектеу жоқ. LOT Polish Airlines әуе компаниясынан Алматы әуежайына рейстерді орындауға сұраныс түскен жоқ", - деп хабарлады Азаматтық авиация комитетінен.

Айта кетейік, қазан айының соңында Алматыдан Оралға 2 күн бойы ұша алмай қалған 140 жолаушы жанжал шығарып, әуежайда түнегенін жазған едік.