Құтқарушылар Қарағанды шахтасында қаза тапқан 46-шы кеншінің денесін жер бетіне алып шықты

Костенко атындағы шахтада қаза тапқан 46-шы кеншінің денесі табылып, жер бетіне шығарылды. Қажетті сараптамалар жүргізілді, деп хабарлайды KAZ.NUR.KZ Қарағанды облысы әкімдігінің баспасөз қызметіне сілтеме жасап.

Ведомствоның баспасөз қызметің мәліметінше, іздеу жұмыстарына "Кәсіби әскерилендірілген авариялық-құтқару жұмыстары қызметі" республикалық орталық штабы" ЖШС Қарағанды филиалының тау-кен құтқарушылары жұмылдырылды.

Қала әкімдігі іздеу жұмыстары тәулік бойы жүргізілгенін мәлім етті.

"Костенко атындағы шахтада 6 қарашада сағат 20.00-де кенші Александр Валерьевич Прокудиннің денесі табылып, жер бетіне шығарылды", - делінген хабарламада.

Айта кетейік, Төтенше жағдайлар министрі Сырым Шәріпханов үкімет отырысында іздестіру-құтқару жұмыстары барысында 45 кеншінің денесі және алдын ала болжам бойынша қаза тапқан 46-адамның дене бөлшектері табылғанын мәлімдеген еді.

Естеріңізге сала кетейік, 28 қазан күні Қарағанды облысындағы Костенко атындағы шахтада жарылыс болды. Апат кезінде шахтада 252 адам болған, олардың 205-і жер бетіне шығарылған.