ҰҚК Сириядағы лаңкестердің қатарында болған қазақстандықты елге қайтарды

Қарашаның 10-ы ҰҚК қызметкерлері 2013 жылдан бері Сирияда террористік топтар құрамында болған Қазақстан азаматын Түркиядан Қазақстанға жеткізді, деп хабарлайды Ұлттық қауіпсіздік комитеті ресми сайтында.

Ведомство хабары бойынша, елге қайтарылған азамат радикалдық идеялардан көңілі қалғанын, өз еркімен террористік әрекеттен бас тартып, Түркияға өткенін, одан соң отанына оралу үшін билік өкілдеріне берілуді жөн көргенін айтқан.

Ведомство мәліметіне сүйенсек, қазақстандық бұл әрекетімен лаңкестердің қатарында қызмет етіп жүрген басқа да адамдарға одан әрі террористік белсенділік аймақтарында болудың еш мәнісі жоқ екенін көрсетпек болған.

Қазақстанға келгеннен кейін ол қамауға алынды.

Оған қатысты Қылмыстық кодекстің 257-бабы (Террористік топ құру, оған басшылық ету және оның әрекетіне қатысу) бойынша қылмыстық іс тергеп-тексерілуде.

Ерікті түрде берілу фактісі тергеу барысында ескерілетін болады.