"Қазарнаулыэкспорт" басшысы екі айға қамалды

Қаражат жымқырды деген күдікпен ұсталған "Қазарнаулыэкспорт" кәсіпорнының басшысы екі айға қамауға алынды, деп хабарлайды KAZ.NUR.KZ Астана соттары Facebook-тегі ресми парақшасына сілтеме жасап.

"2023 жылғы 11 қарашада Астана қаласының мамандандырылған ауданаралық тергеу соты күдікті А.Рамазановты 2 ай мерзімге күзетпен ұстау түріндегі бұлтартпау шарасын санкциялады", - деп хабардар етті соттан.

Астана қаласының мамандандырылған ауданаралық тергеу соты өзге мәліметтер Қылмыстық-процестік кодекстің 201-бабына сәйкес жариялануға жатпайтынын мәлім етті.

Еске салайық, бұған дейін Астанада "Қазарнаулыэкспорт" РМК лауазымды тұлғалары мен бақылауындағы заңды тұлғалардың басшылары ұсталғаны туралы жазған едік.

Олар мемлекеттік қорғаныс тапсырыстарын орындау аясында бағаны көтеру арқылы әскери және әскери-техникалық мақсаттағы тауарларды сатып алу кезінде 1 млрд теңгеге жуық бюджет қаражатын жымқырды деген күдікке ілінген.