"Қарттар мен балалар көшеге шықпағаны жөн": Жеңіс Қасымбек астаналықтарға үндеу жасады (видео)

Астана әкімі Жеңіс Қасымбек ауа райының күрт өзгеруіне байланысты қала тұрғындарына үндеу жасады. Бұл туралы KAZ.NUR.KZ қала басшысының Instagram-дағы ресми парақшасына сілтеме жасап хабарлайды.

Әкімнің айтуынша, түнгі уақытта жауған жаңбырдың салдарынан Астана жолдары көктайғақ.

Қазіргі уақытта коммуналдық қызметтер жолдар мен тротуарларға құм-тұз қоспасын себуде. Олар түннен бері жұмыс істеп жатыр.

"Оқыс жағдайға ұшырап, жарақат алмас үшін қарттар мен балалар көшеге шықпағаны жөн. Ал көлік иелері өте мұқият болуы және қашықтықты сақтауы қажет. Травматологиялық пунктердің жұмысы күшейтілді", - деп ескертті Астана әкімі.

Жеңіс Қысымбек аудан әкімдіктеріне және МИБ/ПИК-ке аулалар мен қоғамдық орындарға инертті материал шашу тапсырылғанын атап өтті.

Айта кетейік, бұған дейін елордалық полицейлер 5 желтоқсанға қараған түні Астанада 63 жол-көлік оқиғасы тіркелгенін хабарлаған еді.

Сонымен қатар ауа райының қолайсыздығына байланысты Астанада мектеп оқушылары бүгін қашықтан оқитын болады.