Ақпараттық арна қайтадан "24 KZ" брендімен эфирге шығады

Желтоқсанның 11-нен бастап "Хабар 24" бұрынғы "24 KZ" брендімен эфирге шығады. Ақпараттық арна өз тарихында екінші рет ребрендинг жасап отыр, деп хабарлайды KAZ.NUR.KZ "Хабар 24" телеарнасына сілтеме жасап.

Ақпараттық телеарнаның сырт пішіні ғана емес, ішкі мазмұны да жаңарған.

Телеарнаның жаңарған логотипі ақ-қызыл түсті екі цифрдан тұрады. Алқызыл түс - рауандап атқан жаңа күннің басталуын білдірсе, KZ белгісі телеарнаның қазақстандық арна екендігін білдіреді.

"Біз көрермендердің арнамыздың қай атауын көбірек қолданатынын білу мақсатында сауалнама жүргіздік. Бір қызығы, "24 KZ" арнасының атауы "Хабар 24-ке" қарағанда жиі қолданылатын болып шықты. Дегенмен арна "24 KZ" атауымен небәрі 4 жыл, ал "Хабар 24" атауымен шамамен 7 жыл хабар таратты. Яғни телеарна аудиториясы үшін "24 KZ" атауы әлі күнге дейін таныс болып отыр", - дейді "Хабар" Агенттігі" АҚ Басқарма төрағасы Кемелбек Ойшыбаев.

Айта кетейік, Қазақстанда тәулік бойы хабар тарататын "Хабар 24" телеарнасы эфирге 2012 жылдың 1 қыркүйегінде шықты.