Атақты Асы жайлауы мемлекет меншігіне өтті
Опубликовано:
Асы жайлауы мемлекет меншігіне өтті. Бұл туралы AMANAT партиясы "Жер аманаты" республикалық комиссиясының өңірдегі көшпелі отырысында айтылды, деп хабарлады Алматы облысы әкімдігінің баспасөз қызметінен.
Облыстық әкімдік өкілдерінің хабарлауынша, өңірге жұмыс сапарымен келген партияның атқарушы хатшысы, "Жер аманаты" комиссиясының төрағасы Дәулет Кәрібек, комиссия төрағасының орынбасары, Мәжіліс депутаты Бақытжан Базарбек, АШМ Жер ресурстарын басқару комитетінің төрағасы Мұрат Теміржанов Еңбекшіқазақ ауданында болып, Масақ ауылдық округінің тұрғындармен және шаруа қожалық иелерімен кездескен.
Мәжіліс депутаты Бақытжан Базарбек "Іле-Алатау Тур" ЖШС-нен №03-044-184-002 кадастрлық нөмердегі аумағы 3 500 гектар ауылшаруашылық мақсатындағы атақты "Асы жайлауы" деп аталатын жердің мемлекет меншігіне қайтарылғанын жария етті.
"Асы жайлауы мемлекет меншігіне Еңбекшіқазақ ауданы әкімдігінің 2023 жылғы 1 маусымдағы №907 қаулысымен қабылданды. Сондай-ақ Бұғыты қыстауында 2,4 мың гектар ауылшаруашылық мақсатындағы жерлер қайтарылды", - деді ол.
Айта кету керек, биыл Алматы облысында игерілмей жатқан 213.5 мың гектар жер мемлекет меншігіне өтті.
Мақаланың түпнұсқасы: https://kaz.nur.kz/society/2051453-ataqty-asy-zailauy-memleket-mensigine-otti/
