Алматы орталығында орналасқан заңсыз салынған сауда павильондары бұзылады

Алматы қаласы Достық даңғылындағы заңсыз салынған сауда павильондары бұзылады. Бұл туралы қала әкімдігінің Telegram-дағы ресми арнасында хабарланды.

Алматы қаласы қала құрылысын бақылау басқармасының мәліметінше, Достық даңғылы 170/1 мекенжайы бойынша учаскедегі сауда нысандары заңсыз салынған.

Сот биыл 2 мамырда осы сауда павильондарын бұзу туралы шешім шығарған, сот шешімін орындау үшін дүңгіршектерді бөлшектеу жұмыстары басталған.

"Сол учаскеде орналасқан ғимаратты бұзу бойынша сот процестері де аяқталды. Бұған дейін басқарма меншік иесіне қатысты 2022 жылғы 28 қазанда Медеу аудандық сотына бұзу туралы талап арыз берген болатын", - делінген әкімдік хабарламасында.

9 маусымда сот шешімімен бұзу талабы қанағаттандырылған. 2023 жылғы 29 тамызда Алматы қалалық сотының қаулысымен Медеу аудандық сотының шешімі өзгеріссіз қалған.