Леонардо Ди Каприо Қазақстан үкіметіне жүгінді

Актер Леонардо Ди Каприо Қазақстан үкіметін киіктердің көбеюімен құттықтады - бұдан былай киіктер қазір жойылып кету қаупі бар жануарлар санатына жатпайды. Бұл туралы KAZ.NUR.KZ актердің әлеуметтік желідегі парақшасына сілтеме жасап хабарлайды.

Голливуд актері киіктер Халықаралық табиғатты қорғау одағының (IUCN) Қызыл тізіміндегі "жойылып кету қаупі төнген жануарлар" санатынан "қатерлі жағдайға жақын" санатына ауысқанын еске салды.

"Бұл бұрын-соңды болмаған жағдай Қазақстандағы ақбөкен популяциясының керемет сақталуын көрсетеді. 2005 жылы бұл түрдің саны небәрі 48 000 болды, ал қазір ол жабайы табиғатта 1,9 миллионнан асатын көрсеткішке жетті. Браконьерлікке қарсы күрес бастамаларына, құқықтық тәртіпті нығайтуға және жаңа қорғалатын аумақтарды құруға қомақты қаражат салған Қазақстан үкіметін құттықтаймыз.

Олардың табиғатты қорғау ұйымдарымен, университеттермен және ғалымдармен ынтымақтастығы – бірлескен күш-жігердің арқасында қол жеткізілген табиғатты қорғау ісіндегі шынайы табыстың жарқын мысалы", - делінген Ди Каприоның Instagram-дағы ресми профилінде.

Бұған дейін Экология министрлігі Халықаралық қорғау одағы киіктер қазір жойылып кету қаупі төнген жануарлар санатына жатпайтынын хабарлаған болатын.

Айта кетейік, World Wide Fund for Nature ресми сайтында актер Леонардо Ди Каприо қоршаған ортаны қорғаушы және меценат ретінде жазылған. 1998 жылы ол біздің планетамыздың тұрақты болашағын қамтамасыз етуге бағытталған ұйымдар мен бастамаларды қолдау үшін өз қорын құрған.

WWF-тен бөлек Леонардо осы мәселелермен айналысатын бірнеше ұйымның кеңесінде, соның ішінде табиғи ресурстарды қорғау кеңесі (NRDC), Global Green USA және Халықаралық жануарларды қорғау қоры (IFAW) басқарма құрамында бар. Кейінгі 12 жыл ішінде Леонардо негізгі мәселелерге жұртшылықтың назарын аудару бойынша стратегиялық жұмыс жүргізіп келеді.

Қазақстандағы киік ату мәселесі

Еске салайық, былтырғы жазда елімізде киіктерді ату мәселесі белсенді талқылана бастаған еді. Кейбір аймақтардың шаруалары бұл жануарлар олардың шаруашылықтарына қауіп төндірді деп мәлімдеді: егістіктер тапталып, дақылдарды жеп кеткен.

Кейін Экология министрлігі Орман шаруашылығы және жануарлар дүниесі комитетінің төрағасы Нұрлан Қылышбаев биліктің киік санын қандай жолмен реттеуге ниетті екенін айтып берді.

Шілдеде президент Қасым-Жомарт Тоқаев сол кездегі Экология министрлігінің басшысы Серікқали Брекешевке "киік популяциясының болашақ тағдыры төңірегіндегі түсінбеушілік пен пікірталас үшін" сөгіс жариялады. Мемлекет басшысы киік Қазақстандағы қасиетті жануар екенін айтты.

Осыдан кейін Экология министрлігі ақбөкендердің санын реттеу туралы шешім ғылыми зерттеу жүргізілмейінше қабылданбайтынын мәлімдеді. Ал осы жылдың басында Қазақстанның төрт облысында және тек ғылыми мақсатта киіктерді атуға рұқсат етілетіні хабарланды. Кейінірек далада киіктердің санын реттеу үшін арнайы бригадалар жұмыс істейтіні белгілі болды, ал сойылған жануарлардың еті бірден БҚО-ның үш зауытында өңделетіні айтылды.