Қазақстанда неке шартын жасасу міндеттеле ме: министр жауабы

Үкіметтегі брифингте әділет министріне елде ажырасу көбейгендіктен Қазақстанда некеге тұру кезінде міндетті неке шарттары қажет пе деген сұрақ қойылды. Бұл туралы KAZ.NUR.KZ тілшісі хабарлайды.

"Қазір, менің білуімше, неке шартын жасасуға да, жасаспауға да болады. Меніңше, бұл оңтайлы шешім, өйткені бұл неке қатынастарына түскісі келетіндерге берілетін құқық, олар өзі шеше алады (шарт жасасу мәселесін айтады - авт. ескертпесі)", - деп түсіндірді әділет министрі Азамат Есқараев.

Ол Әділет министрлігі Қазақстанда міндетті түрде неке шартын жасасуды енгізуді жоспарлап отырмағанын айтты.

Неке шарты қалай жасалады

eGov ресми сайтындағы мәліметке қарағанда, неке шарты неке басталғанға дейін де, адамдар некеде тұрған кезде де жасалуы мүмкін.

Егер неке шартын жасасу неке тіркелгенге дейін жасалса, ол некені мемлекеттік тіркеу кезінде заңды күшіне енеді. Егер неке шартын жасасу туралы шешімді некеде тұрған ерлі-зайыптылар қабылдаса, онда мұндай шартты жасасу сәті оны нотариус куәландырған сәт болып танылады.

Неке шарты жазбаша түрде жасалады, құжат мәтінінде ерлі-зайыптылардың келісімге келген барлық маңызды шарттары жазылуы керек. Нотариуста неке шартын куәландыру міндетті.

Қажет болса, нотариус неке шартын куәландырып қана қоймай, оның жобасын жасауға көмектеседі. Неке шартын куәландырмас бұрын нотариус ерлі-зайыптыларға олардың құқықтары мен міндеттерін, олар жасасатын шарттың мәні мен мағынасын түсіндіруге, оны жасасудың заңды салдары туралы ескертуге міндетті.

Мәтіннен қате тапсаңыз, бізге жазыңыз