Астана әкімдігі қала тұрғындары мен қонақтарына үндеу жасады

Астана әкімдігі 31 желтоқсанда ауа райының нашарлауына байланысты қала тұрғындары мен қонақтарына үндеу жасады, деп жазады KAZ.NUR.KZ елорда әкімдігінің ресми Instagram парақшасына сілтеме жасап.

Ведомствоның хабарлауынша, коммуналдық қызметтер тұрғындардың ыңғайлы жүріп-тұруы үшін тәулік бойғы жұмыс режиміне көшті.

31 желтоқсанда елордада қар жауып, боран соғады, көктайғақ болады. Оңтүстік-батыстан соғатын желдің екпіні 20 м/с, кей жерлерде 28 м/с жетеді.

"Елорда тұрғындары мен қонақтарын жолда аса сақ болуды, жол қозғалысы ережелерін сақтауды және ұзақ сапарға шықпауды сұраймыз", - делінген ресми хабарламада.

Әкімдіктің ақпаратына сәйкес, қысқы кезең басынан бері елорда көшелерінен 800 мың текше метрге жуық қар шығарылды. Бұл шамамен 60 мың жүк рейсін құрайды.

Мәтіннен қате тапсаңыз, бізге жазыңыз