Астанада қалың қар жауды: көшелерді жүздеген адам мен мыңнан аса техника тазартып жатыр

Жауын-шашынның мол түсуіне байланысты елорданың коммуналдық қызметкерлері тәулік бойы жұмыс істеп, қала көшелерін қардан тазартуда, деп хабарлайды елорда әкімдігінің ресми сайты.

Әкімдік өкілдерінің айтуынша, 300-ден астам жол жұмысшысы 1200-ден астам техникамен түнгі ауысымда көшелерді қардан тазартуға шықты.

Ең алдымен, ережелерге сәйкес, жолдарда кептеліс болмауы үшін қарқынды қозғалыс аймақтары тазартылады. Сондай-ақ орташа қозғалыс қарқындылығы бар учаскелер - алаңдар, вокзал маңы аумақтары, тротуарлар, әлеуметтік нысандарға кірме жолдар және тағы басқасы қардан тазартылады.

Айта кетейік, 7 қаңтарда Астана көшелерінен 35 мың текше метрден астам қар шығарылған, бұған 2741 жүк рейсі қажет.

"Қыс маусымының басынан бастап елордада 1 406 985 текше метр қар шығарылды, бұл 103 мыңнан астам ауыр жүк рейсі", - делінген сайт хабарында.

"Қазгидромет" РМК мәліметінше, 8 қаңтарда Астанада ауа райы бұлтты, кейде қалың қар, боран болуы мүмкін. Оңтүстік-батыстан соққан желдің жылдамдығы 9-14 м/с, екпіні 15-20 м /с дейін күшеюі күтіледі. Ауа температурасы түнде және күндіз 0-2 градус аязды көрсетіп тұр.

Мәтіннен қате тапсаңыз, бізге жазыңыз