"Өзім тігіп аламын": астаналық 95 жастағы модель әже көпшілікті таңғалдырды (фото, видео)

Астаналық 95 жастағы Жамария Хабан көпшілікті стильді киімдерімен таңғалдырды. Қария "Таңшолпан" бағдарламасында киімдерін өзі тігіп алатынын айтты, деп жазады KAZ.NUR.KZ.

Бағдарлама мәліметінше, әжейдің жасы оның сүйікті ісіне кедергі келтірмейді.

"Балаларымның күтімі жақсы әсер етіп отыр ғой. Тамағымды дайындап береді, жатқызады-тұрғызады. Көлікке көтеріп мінгізіп, көтеріп түсіреді. Осылардың арқасында жыбырлап, тірі жүрмін.

Таңертең тұра сала жылы суға бір қасық бал салып ішемін. Жас кезімде би де биледім, киім де тіктім. Көйлегімді өзім өлшеп, өзім тігіп аламын", - деді Жамария Хабан әже.

Әжейдің видеоларын әлеуметтік желіге немере келіні жариялаған.

"Экранға шығу жас кезінен арманы болған екен. Бізбен бірге сауда орталықтарына киініп, әдемі болып барады. "Адамдар не ойлайды" деген қорқынышы жоқ", - деді немере келіні Айжібек.

Айта кетейік, Жамария әжей жеті бала өсіріп, бүгінде 10 немере, 15 шөбере сүйіп отыр.

Мәтіннен қате тапсаңыз, бізге жазыңыз