Астана халықаралық әуежайында кешіктірілген рейстер ұша бастады

Елорда әуежайындағы жағдай тұрақталып келеді. Әуежайдың ішкі және халықаралық рейстер терминалындағы жұмыс қайта жанданып, жолаушылар тіркеуден өте бастады, алты рейс әуежайдан ұшып кетті. Бұл туралы Азаматтық авиация комитетіне сілтеме жасаған KAZ.NUR.KZ хабарлайды.

Осыған дейін төтенше жағдай салдарынан Астана әуежайынан ұшатын 18 рейс (14 рейс Қазақстан ішінде, 4 халықаралық рейс) кешіктірілген еді.

"Әуежайдың ішкі және халықаралық рейстер терминалындағы жұмыс 10:48-де жанданып, жолаушылар тіркеуден өте бастады", - делінген комитеттің Telegram-арнасында жарияланған хабарламада.

Ведомство өкілдерінің мәліметінше:

• DV702 Астана-Шымкент рейсі 12:23-те;
• IQ389 Астана-Жезқазған 12:26-да;
• IQ437 Астана-Петропавл 13:38-де;
• KC952 Астана-Алматы 12:46-да;
• КС7052 Астана-Алматы 13:36-да;
• KC205 Астана-Дубай 13:04-те ұшты.

"Төтенше жағдай кезінде елорда әуежайында ҚР Көлік министрлігі Азаматтық авиация комитетінің басшылығы, ҚР Авиациялық әкімшілігі қызметкерлері және Terminals Airport Astana Management LLP, әуежай қызметкерлерінің қатысуымен оперативті штаб құрылып, жедел әрекет етті.

Эвакуацияланған жолаушыларға сусын, жеңіл тағам ұсынылды", - делінген хабарламада.

Ведомство өкілдері жолаушылардың қауіпсіздігі әуежай басшылығының басты назарында екенін, сондықтан әуежайдағы қауіпсіздік шараларын қалыпқа келтіру және күшейту шаралары жалғасатынын мәлімдеді.

Айта кетейік, бүгін, 27 ақпанда таңертең Астана әуежайынан адамдар эвакуацияланды – терминалдың электр қалқанында өрт шыққан.

Мәтіннен қате тапсаңыз, бізге жазыңыз