Семейде самса сататын дүңгіршектің сөресінде емін-еркін жүрген тышқан видеоға түсіп қалды

Семейде тағамын кеміргіштер аралаған дүңгіршек жабылды. Өңірдің Санитариялық-эпидемиологиялық бақылау департаменті мамандары кәсіп иесіне тексеріс жүргізіп, әкімшілік хаттама толтырды, деп хабарлайды KAZ.NUR.KZ тілшісі.

Самса сататын дүңгіршектегі жағдайды жергілікті тұрғындардың бірі видеоға түсіріп алған. Бейнежазба мессенджерде тарады.

Бейнежазбада сөреде тұрған самса арасында кеміргіштердің емін-еркін аралап жүргенін көруге болады. Тіпті ашыққаны соншалық, тышқан түсіріп тұрған адамнан да қорықпайды.

Қазір тазалықты ұмытып тышқандарға жем болған кәсіпкер дүңгіршегін жапқан. Ал ішіндегі азық-түлік толықтай жойылды. Енді базар маңында самса сататын дүңгіршектің иесі әкімшілік жауапқа тартылады.

"Хаттама әкімшілік сотқа жіберілді. Яғни кәсіпкер Әкімшілік құқықбұзушылық туралы кодекстің 425-бабының 1-бөлігіне сәйкес жауапқа тартылады. Жалпы оған талаптарды бұзғаны үшін 230 айлық есептік көрсеткіш көлемінде айыппұл салу көзделген. Сондай-ақ арнайы қаулы шығарылып дүңгіршек жұмысын тоқтатты", - деді Абай облысының санитариялық-эпидемиологиялық бақылау департаментінің бөлім басшысы Әйгерім Мұсатаева.

Автор: Елжан Нұрболат