"Сұрамаса да жібереміз": Қырғызстан Қазақстанға гуманитарлық көмек көрсетеді

Қырғызстан министрлер кабинетінің басшысы Ақылбек Жапаров Қырғызстаннан Қазақстанға гуманитарлық көмек жіберілетінін айтты. Бұл туралы "Sputnik Кыргызстан" хабарлады.

Министрлер кабинетінің басшысы Ақылбек Жапаров Қазақстан Республикасының су тасқынынан зардап шеккен аймақтары үшін Қырғызстан Төтенше жағдайлар министрлігі елде өндірілген өнімдерден гуманитарлық жүк әзірлейтінін айтты.

"Жылу электр орталығында апат болған кезде біз ештеңе сұраған жоқпыз, бірақ көрші ел Қазақстан бізге гуманитарлық көмек жіберді. Біз де сұрамаса да, көмек жібереміз.

8 сәуірде Қазақстанның премьер-министрі Бішкекке келеді, тағы қандай көмек қажет екенін талқылаймыз", - деді Жапаров парламент отырысында.

Айта кетейік, ТЖМ Ақтөбе, Батыс Қазақстан облысы және Қостанай облыстарында су тасқынына байланысты жағдай қиындағанын мәлім етті. Ведомство өкілдері республика бойынша 6 облыста (Ақтөбе, Қостанай, Батыс Қазақстан, Павлодар, Ақмола және Атырау облыстары) су басу қаупі сақталып отырғанын атап өтті.