Астана орталығында бұқа қуған полицейлердің видеосы тарады

Астана орталығында бұқаны қуған полицейлердің видеосы тарады. Тәртіп сақшыларына қала тұрғындары да көмектесуге тырысқан.

Instagram-дағы Levy_bereg_astana парақшасында 6 мамырда Астана қаласының орталығында түсірілген видео жарияланды. Кадрлардан полиция қызметкерлері мен бірнеше азамат көшеде келе жатқан бұқаны ұстауға тырысқанын көруге болады. Алайда олар жануарды ұстай алмайды.

Қалалық полиция департаментінің өкілдері жануар ақыры ұсталғанын хабарлады.

"Малды "Байқоңыр" ауданының учаскелік полиция инспекторлары ұстады. Бұқа жүк тиеу кезінде Брусиловский көшесіндегі үйдің ауласынан арқанмен байланып тұрған кезінде қашып кеткені анықталды. Полицейлер көшеде жүгіріп жүрген жануарды ұстап алып, өтіп бара жатқан адамдарға, әсіресе балаларға қауіп төндірмеу үшін жедел әрекет етті", - делінген жауапта.