Бұршақ жауып, дауыл соқты: Астанада күн бұзылды (фото, видео)

Астанада бірнеше күн қатарынан найзағай соғып, нөсер жаңбыр құйып жатыр. Ал бүгін ауа райының қолайсыздығы тіпті күшейді. Қалада бірнеше сағат сайын бұршақ жауып, найзағай ойнап, дауыл соғып жатыр, деп хабарлайды KAZ.NUR.KZ.

Астана әкімдігі өкілдерінің хабарлауынша, жауын-шашынның, соның ішінде нөсер жаңбырдың салдарынан бірқатар көшеде су жиналып қалған. Қазіргі уақытта қаладағы суды сорып шығару жұмыстарына 100-ден астам арнайы техника жұмылдырылған.

Жаңбырдан кейінгі су тасқыны елордалықтар үшін қалыпты жағдайға айналған. Дегенмен әкімдіктің мәліметінше, Астанада "2035 жылға дейін нөсерлі кәріз жүйесін дамыту" бойынша техникалық-экономикалық негіздеме әзірленіп жатыр.

Елорданың басты даңғылдарының бірі – Мәңгілік Ел көшесінің қазіргі көрінісі осындай. Мұнда арнайы техника суды сорып шығарды.

Басқа көшелердің жолы болмады, кейбіреулері тіпті су астында қалды – жұрт судан әрең өтіп жатыр.

Қаланың кей жерінде астаналықтар нөсер жаңбырды ғана емес, үлкен бұршақ жауғанына да куә болды.