Астана әкімдігі университеттерге 858 грант бөлді: оған кімдер үміткер бола алады

Астана әкімдігі елорданың жоғары оқу орындарына 858 білім грантын бөлді. Гранттар жоғары және жоғары оқу орнынан кейінгі білімі бар кадрларды даярлауға бағытталған, деп хабарлайды қала әкімдігі Telegram-дағы арнасында.

Әкімдік ақпаратынша, 2018 жылдан бастап Астана қаласының әкімдігі педагогикалық, медициналық мамандықтар бойынша, сондай-ақ гуманитарлық бағыт бойынша жоғары және жоғары оқу орнынан кейінгі білімі бар кадрларды даярлауға мемлекеттік білім беру тапсырысын бөлу жобасын іске асырып келеді.

"Бұл жоба кадр тапшылығы мәселесін шешуге бағытталған. 2024-2028 оқу жылдарына қала әкімдігі жоғары және жоғары оқу орнынан кейінгі білімі бар кадрларды даярлауға 858 білім беру грантын белгіледі", - делінген хабарда.

Астана әкімдігінің білім гранттары еліміздің сегіз жоғары оқу орнына бөлінген.

1. Л.Н. Гумилев атындағы Еуразия ұлттық университеті;
2. Астана халықаралық университеті;
3. А. Құсайынов атындағы Еуразия гуманитарлық институты;
4. Дене шынықтыру және бұқаралық спорт академиясы;
5. Ә.Марғұлан атындағы Павлодар педагогикалық университеті;
6. А.Байтұрсынұлы атындағы Қостанай мемлекеттік университеті;
7. Ұлттық ғылыми онкологиялық орталық;
8. Астана медицина университеті.

Білім беру грантына конкурсқа еліміздің түкпір-түкпірінен үміткерлер қатыса алады. Білім беру гранттары иегерлерінің тізімі 25 тамызға дейін жарияланады.