Қырғызстаннан Қазақстанға 600 мыңнан астам жұмыртқа кері қайтарылды

Қазақстаннан Қырғызстанға 600 мыңнан астам тауық жұмыртқасы заңсыз тасымалданғаны белігілі болды. Бұл туралы KAZ.NUR.KZ Қырғыз Республикасының Су шаруашылығы, ауыл шаруашылығы және өңдеу өнеркәсібі министрлігіне сілтеме жасап хабарлайды.

Қырғызстанда "Ақ-Тілек" шекаралық ветеринарлық бақылау бекетінің инспекторлары Қазақстаннан елге заңсыз 626 400 дана тауық жұмыртқасы әкелінгенін анықтады, делінген ведомствоның ресми сайтында.

Қырғызстан Республикасы министрлер кабинетінің 6 маусымдағы қаулысы бойынша елге тауық жұмыртқасын әкелуге уақытша шектеу енгізілген.

"Инспекторлар тиісті қайтару актісін жасап, жүк "Ақ-Тілек" бақылау пункті арқылы Қазақстан Республикасына кері қайтарылды", - делінген хабарламада.

Айта кетейік, Қырғызстанның "Токтом" ақпараттық-құқықтық порталы маусым айында елге тауық жұмыртқасын әкелуге уақытша алты айға тыйым салынғанын хабарлаған болатын.

Бұл шара Қырғызстанның азық-түлік қауіпсіздігін қамтамасыз ету, ішкі нарықтың қалыпты жұмыс істеуі үшін азық-түлік тауарларының нарықтық бағасын тұрақтандыру мақсатында енгізілген.