Air Astana Қазақстаннан Сауд Арабиясына ұшатын рейстер санын көбейтті

Air Astana Сауд Арабиясына ұшу географиясын кеңейтеді. Әуе компаниясы Шымкенттен Жидда қаласына тұрақты тікелей рейстерді қосып жатыр, деп хабарлайды KAZ.NUR.KZ әуекомпанияға сілтеме жасап.

"Жаңа тұрақты рейс 2024 жылғы 1-28 қазан аралығында Алматы-Жидда әуе қатынасына қосымша аптасына 2 рет орындалады.

28 қазаннан бастап Шымкент-Жидда бір жиілігі аптасына 1 рет орындалатын Шымкент-Мәдина бағытына ауыстырылады. Сондай-ақ 29 қазаннан бастап Алматы-Мәдина бағытында аптасына 2 рет тікелей рейс іске қосылады", - делінген хабарламада.

Әуекомпанияның мәліметінше, рейстердің барлығы бизнес-кластағы 16 орны және эконом-кластағы 150 орны бар Airbus A321LR жайлы әуе кемесімен орындалады.

"Шымкент-Жидда және Шымкент-Мәдина рейстерінің ұшу ұзақтығы – 5 сағат 35 минут, Алматы-Мәдина – 6 сағат 10 минут.

Шымкент-Жидда бағыты бойынша барлық алыммен екі жаққа да билеттердің ең төменгі құны 301 208 теңгеден, Алматы-Мәдина – 336 882 теңгеден, Шымкент-Мәдина – 308 050 теңгеден басталады.

Қазақстан азаматтары Сауд Арабиясына сапар алдында электрондық виза алуы қажет", - дейді әуекомпания өкілдері.

Жидда – Сауд Арабиясындағы көлемі жағынан үлкен екінші қала және оның "экономикалық астанасы". Бұл қаладан Меккеге дейін жүрдек пойызбен бір сағатта жетуге болады.

Мәдина – мұсылмандардың Меккеден кейінгі екінші қасиетті қаласы. Пайғамбар мешіті ислам дінінің Меккедегі әл-Харам мешітінен кейінгі екінші киелі орны болып саналады. Қалада басқа да көптеген мешіт, мұражайлар, сауда орталықтары мен мейрамханалар бар.