Үсік жүріп, қар жаууы мүмкін: қыркүйекте Қазақстанда ауа райы қандай болады

Синоптиктер қыркүйекке арналған консультативтік ауа райы болжамын жасады. Бұл туралы KAZ.NUR.KZ "Қазгидромет" РМК баспасөз қызметіне сілтеме жасап хабарлайды.

Синоптиктердің болжамынша, қыркүйекте республиканың басым бөлігінде ауа райы салқын және жауын-шашынды болады деп күтілуде, тек республиканың батысында қыркүйектің басында ауа райы негізінен жауын-шашынсыз болады.

Қыркүйекте республиканың солтүстік жартысында жауын-шашын ай бойы жауады, үзіліс тек 1-3 күнге созылады. Кей күндері республика бойынша қатты жаңбыр жауып, найзағай, бұршақ, екпінді жел күтіледі. Еліміздің солтүстік жартысында жиі тұман күтіледі.

Қыркүйектің бірінші онкүндігінде ауа температурасы:

• республиканың батысында түнде +8...+15°С, күндіз +23...+30°С;
• республиканың оңтүстік-батысында түнде +17...+25°С, күндіз +28...+35°С, тек кей күндері ауа температурасының шамалы төмендеуі байқалады;
• Ақтөбе облысында ауа температурасы түнде +3...+10°С-тан +10...+15°С-қа дейін, күндіз +17...+25°С-тан +22...+27°С-қа дейін;
• Қостанай облысында түнде +2...+7°С-тан +8...+13°С-қа дейін, күндіз +10...+18°С-тан +17...+25°С-қа дейін ауытқиды деп күтілуде, топырақ бетінде үсік болуы ықтимал.
• Қазақстанның солтүстік және орталық облыстарында түнде +2...+10°С дейін, күндіз +8...+15°С дейін суытады, топырақ бетінде 2° үсік болуы мүмкін, онкүндіктің соңында ауа температурасы шамалы жоғарылауы мүмкін.
• республиканың шығысында ауа температурасы түнде +8...+16°С-тан +2...+7°С-қа дейін, онкүндіктің екінші жартысында үсік болуы мүмкін, күндіз +12...+23°С-тан +17...+25°С-қа дейін ауытқиды;
• республиканың оңтүстігі мен оңтүстік-шығысында күндізгі ауа температурасы +22...+30°C-тан +17...+23°C-қа дейін ауытқиды деп болжануда.

Қыркүйектің екінші және үшінші онкүндігінде республиканың солтүстігінде, орталығында және шығысында түнде ауа температурасы +3...+8°С, кей күндері үсік болуы ықтимал, күндіз ауа температурасы +12...+19°С-тан +21...+26°-қа дейін ауытқиды.

Республиканың батыс және оңтүстік облыстарында ауа температурасы түнде +7...+15°С болады деп болжануда, топырақ бетінде үсік болуы мүмкін; күндіз +25...+35°С-тан +15...+23°C-қа дейін ауытқиды.

Үшінші онкүндікте солтүстік, орталық және шығыс облыстарда жаңбырдың соңы қарға айналуы мүмкін.